राहाता तालुक्यातील गोगलगाव येथे हृदय पिळवटून टाकणारी घटना काळ सायंकाळच्या सुमारास घडली…
राहाता LIVE | राहाता तालुक्यातील गोगलगाव शिवारात काल, रविवारी ( दि. २ नोव्हेंबर 2025 ) सायंकाळी घडलेल्या एका दुर्घटनेमुळे संपूर्ण गावावर शोककळा पसरली आहे. गोरक्षनाथ डोंगरापासून काही अंतरावर असलेल्या चौधरी वस्तीजवळच्या तलावात बुडून शुभम पोपट चौधरी (वय ९, इयत्ता ३ री) आणि त्याची मोठी बहीण दिव्या पोपट चौधरी (वय १०, इयत्ता ४ थी) या दोन निरागस चिमुकल्यांचा मृत्यू झाला. सायंकाळी ५ वाजेच्या सुमारास ही काळजाला पीळ पाडणारी घटना घडली.
दिव्या आणि शुभम, घराच्या आसपास खेळणारी ती दोन आनंदी फुलं होती ,दिव्याचे शाळेतील हसरे चेहरे आणि शुभमची खेळकर मस्ती चौधरी कुटुंबाचे सुख होते. मात्र, काळाने काल सायंकाळी दोघांवरही घात केला. तलावाच्या पाण्यात डुबून त्यांचा मृत्यू झाला आणि चौधरी व निर्मळ कुटुंबाचे हास्य कायमचे थांबले.
या दुर्घटनेची बातमी वाऱ्यासारखी पसरताच परिसरात एकच हाहाकार उडाला. घटनेनंतर तलावाजवळ जमलेल्या प्रत्येक व्यक्तीच्या डोळ्यातून अश्रू वाहत होते. पोटच्या गोळ्यांना गमावलेल्या आई जयश्री पोपट चौधरी आणि वडील पोपट मंजाबापू चौधरी यांची अवस्था तर अतिशय दयनीय होती. शुभम आणि दिव्याचे नाव घेऊन टाहो फोडणाऱ्या त्या आई-वडिलांचे अश्रू कोणत्याही प्रकारे थांबत नव्हते. त्यांचे रडणे ऐकून उपस्थितांचे काळीज हेलावून जात होते.
आज सोमवारी जेव्हा दोघा चिमुकल्यांचे पार्थिव अंत्यविधीसाठी नेले जात होते, तेव्हा शोकाकूल वातावरणामुळे संपूर्ण गोगलगाव सुन्न झाले होते. घरापासून स्मशानापर्यत, चिमुकल्यांना निरोप देण्यासाठी मोठा जनसमुदाय लोटला होता. प्रत्येक जण या निष्पाप जीवांच्या अकाली जाण्याने स्तब्ध झाला होता.
दरम्यान गोगलगाव सह मयत चिमुकल्याचे नातेवाईक उंबरी बाळापूर (ता. संगमनेर) परिसरात असल्याने पंचक्रोशीत देखील हळहळ व्यक्त होत आहे.
